MOOCs 2021

É un MOOC destinado a aprofundar na relación entre a cultura e as plataformas sociais, e como estas novas ferramentas poden converterse en vehículos de aprendizaxe e difusión do patrimonio, empregando o patrimonio cultural xacobeo como exemplo a estudar e sobre o que traballar. Para aprofundar neste uso educativo e divulgativo das redes, o curso divídese en catro módulos, todos eles impartidos por destacados profesionais do sector cultural que tamén teñen unha estreita relación co Camiño de Santiago e unha importante experiencia na xestión de redes sociais. O curso propón unha aplicación práctica e ofrece un acceso privilexiado á experiencia de catro profesionais que destacan no manexo dos novos linguaxes e plataformas de difusión do coñecemento.

Baseándose na riqueza cultural e natural do Camiño de Santiago, o curso «O Camiño de Santiago: enfoques didácticos multidisciplinares» é un MOOC que amosará as posibilidades didácticas que os estudos sobre a peregrinación, a cultura e o patrimonio xacobeo ofrecen para a docencia de disciplinas da rama das Humanidades e das Ciencias Sociais.
Consta de 4 módulos nos que se aportarán exemplos válidos para a didáctica da Historia da Arte; a Xeografía; o Turismo e a Música.

Trátase dun MOOC que pretende servir de introdución ao milenario fenómeno cultural, histórico e espiritual das peregrinacións a Santiago, que cada ano incrementan a súa importancia. Consta de 4 módulos nos que se impartirán temas relacionados coa historia, o patrimonio, a literatura e a economía en relación cos Camiños de Santiago.